Facebook dhe Instagram ka rikthyer në platforma ish-presidentin amerikan Donald Trump. Dënimi për të mbaroi.

Trump u pezullua nga të gjitha rrjetet sociale pasi u akuzua për nxitje të dhunës në protestën dhe sulmin ndaj Capitol Hill.

Meta ka bërë një deklaratë të gjatë sqaruese për largimin e Trump dhe rikthimin e tij. Sigurisht edhe për çfarë e pret nëse shkelja përsëritet.

“Mediat sociale i kanë rrënjët në besimin se debati i hapur dhe rrjedha e lirë e ideve janë vlera të rëndësishme. Si rregull i përgjithshëm, ne nuk duam të pengojmë debatin e hapur, publik dhe demokratik në platformat e Meta-s, veçanërisht në kontekstin e zgjedhjeve në shoqëritë demokratike si Shtetet e Bashkuara. Publiku duhet të jetë në gjendje të dëgjojë se çfarë thonë politikanët e tyre – të mirën, të keqen dhe të shëmtuarën – në mënyrë që ata të mund të bëjnë zgjedhje të informuara në kutinë e votimit. Por kjo nuk do të thotë se nuk ka kufij për atë që njerëzit mund të thonë në platformën tonë. Kur ekziston një rrezik i qartë i dëmtimit të botës reale Meta mund të veprojë.

Dy vjet më parë, ne ndërmorëm veprime në rrethana ekstreme dhe shumë të pazakonta. Ne pezulluam për një kohë të pacaktuar llogaritë e presidentit të atëhershëm të SHBA, Donald Trump në Facebook dhe Instagram pas lavdërimit të tij për njerëzit e përfshirë në dhunën ndaj Capitol, më 6 janar 2021. Më pas ia referuam atë vendim Bordit Mbikëqyrës – një organ ekspert i krijuar si një kontroll i pavarur. Bordi e la në fuqi vendimin, por kritikoi natyrën e hapur të pezullimit dhe mungesën e kritereve të qarta se kur dhe nëse llogaritë e pezulluara do të rikthehen, duke na drejtuar që të shqyrtojmë çështjen për të përcaktuar një përgjigje më proporcionale.

Në përgjigje të Bordit, ne vendosëm një pezullim të kufizuar me kohë prej dy vitesh nga data e pezullimit fillestar më 7 janar 2021 – një kohëzgjatje e paprecedentë për një pezullim të tillë.

Pezullimi ishte një vendim i jashtëzakonshëm i marrë në rrethana të jashtëzakonshme. Tani periudha kohore e pezullimit ka kaluar.

Në rast se zoti Trump poston përmbajtje të mëtejshme dhunuese, përmbajtja do të hiqet dhe ai do të pezullohet nga një muaj deri në dy vjet, në varësi të shkeljes”, shkruhet në deklaratën e Meta.