Ahmetaj, kurbani që i duhet Ramës për të hequr vëmendjen nga afera ‘McGonigal’

Boçi: Ahmetaj, viktima që i duhet Ramës për të hequr vëmendjen nga afera ‘McGonigal’

Deputeti i Partisë Demokratike, Luçiano Boçi thotë se ish ministri dhe ish zv.kryeministri Arben Ahmetaj është “viktima” që i duhet Ramës për të hequr vëmendjen nga afera McGonigal.

“Arben Ahmetaj është viktima që i duhet Ramës për të hequr vëmendjen nga afera McGonigal dhe njëherësh për të pretenduar se drejtësia e re po funksionon. Alibia e dyfishtë e Ramës në fakt është vetëm një iluzion. Marrëdhënia e Kryeministrit, por dhe e shtetit shqiptar me Shtetet e Bashkuara është shqepur keqaz. Dhe ajo që amerikanët nuk mund t’ja falin Ramës shkon shumë përtej aferës me McGonigal”, shkruan deputeti në një postim në rrjetet sociale.

Sipas tij, qeveria aktuale po paguan më shumë për të përgjuar shtetasit, sesa për të mbrojtur të dhënat e tyre dhe në këto kushte, përgjigjja për këtë gjë do të jepet më 14 maj.

“Një qeveri që harxhon më shumë për të përgjuar shtetasit e vet (me një rrjet agjenturoro- politik si patronazhistët), sesa për të mbrojtur të dhënat bazë të këtyre shtetasve – meriton vetëm një shpërblim: atë që do të marrë me 14 Maj!

Por është e pritshme që amerikanët të dinë për Ramën shumë më tepër sesa di për të Shërbimi Informativ i vendit, të cilin Rama e nxori të gjithin lakuriq – me emra, kontakte, emaile, adresa etj.

Por Rama do të përgjigjet për shumë më tepër sesa kaq. Ai do të përgjigjet edhe për atë që ne nuk e dimë ende, por dikush do ta sjellë në tryezë dhe ashtu si Friedrich Nitzche thotë tek Ecce Homo, “njeriu është i dënuar të thotë ‘Po, më kujtohet’, dhe ky është mallkimi i tij””, shkruan Boçi.