Tre atletët më të paguar në sportin botëror gjatë 12 muajve të fundit ishin të gjithë futbollistë, sipas listës së vitit 2023 të publikuar nga Forbes.

Pas transferimit tek Al-Nassr, Cristiano Ronaldo është bërë sportisti më i paguar në botë për 2023. Portugezi fitoi 136 milionë dollarë, 46 milionë dollarë në fushë dhe 90 milionë dollarë jashtë fushe, pasi u largua nga Manchester United dhe u transferua te klubi në Arabinë Saudite në vitin 2022 me një kontratë 2-vjeçare.

I dyti dhe i treti në listë janë sulmuesit e Paris Saint-Germain, Lionel Messi dhe Kylian Mbappe.

Messi thuhet se ka fituar 130 milionë dollarë – më shumë se 350,000 dollarë në ditë – gjatë vitit të kaluar.

Mbappe, i cili fitoi Këpucën e Artë në Kupën e Botës ku ishte një finalist humbës me Francën, fitoi 120 milionë dollarë në 12 muajt e fundit.