Lidhu me ne

Kritike

Nga Lutfi Dervishi/ Falimentimi i fjalës…

LUTFI DERVISHI

Nga Lutfi Dervishi/ Falimentimi i fjalës...

Fjala dhe lajmëtari kanë një mbrojtje të fortë në Kanun: “Fjala nuk bën mort”, “Lajmësi nuk ka faj”.

Në të njëjtën kohë, nga ana tjetër Kanuni tregohet i ashpër me thashethemexhinjtë dhe dallkaukët:

“Ai që mbjell e hap fjalë të këqija e gërgasa, herë për njanin e herë për tjetrin, me gojë të kanunit thirret ‘Argat i së keqes’ – as e thërret kush në punë, as i nep kush rrogë.” (Fjala; nyja e 86)

Por mjerisht, fjalët, dikur shtylla komunikimi, po shkërmoqen nga mbipesha e gënjeshtrave, sajesave, thashethemeve dhe po zhvlerësohen përballë propagandës, premtimeve të rreme e teorive konspirative.

Harrohet se “Burri kapet prej fjalet” dhe “Fjala asht s’asht, e asht thyen”.

Fuqia e fjalës përherë e më shumë minohet nga akuzat ndaj gazetarëve, integriteti i së cilëve është lëkundur sa nga akuzat për korrupsion e shantazh, aq edhe nga uria për vëmendje apo klikime më shumë.

Në këtë vorbull të marrëzisë digjitale, po ngrenë krye sharlatanët, megallomanët, mitomanët dhe “profetët” e vetëshpallur.

Metamorfoza e fjalëve, nga mjete komunikimi, te municion për betejat politike, është e qartë si kristali në Parlament, në 15 kanalet televizive me 24 orë “lajme”, në 56 televizionet e tjera gjeneraliste, në 800 portalet e dedikuar për lajme dhe pa diskutim, në shkurret e pafundme të rrjeteve sociale.

Rrjetet sociale dhe portalet, fushë beteja e epokës sonë digjitale, përmes përronjve të urrejtjes dhe të ndihmuar nga anonimati, kujdesen që vorbulla e kaosi të mos mungojë qoftë dhe një minutë.

Televizionet me oreks elefanti për “debate” po e shndërrojnë informacionin në kakofoni. Çdo shpresë për pak qartësi e kuptim, zhytet në oqeanin e fjalëve.

Debatet e përnatshme i ngjajnë dramave shekspiriane, ku protagonistët nuk janë mbretër e mbretëresha, por “koka të mëdha” që parashikojnë kobë, mënxyra, gjakderdhje, thika pas shpine, arrestime, investime, gjëmime e tërbime.

Në këtë cirk të përditshëm e të përnatshëm, futen edhe zyrtarët/qeveritarët të cilët kanë marrë detyrën e pa kërkuar të rrefyesve duke raportuar për veten se sa mirë po punojnë për këtë vend të bekuar dhe sa shumë po treten për të realizuar ëndrrën shekullore të popullit për anëtarësim në BE.

Thënia e fjalës së fundit në fillim, është kthyer në moto të diskursit publik.

Mjerisht, vendi e gjen veten jo në një shoqëri informacioni, por në një shoqëri thashethemi, ku vija mes faktit dhe trillimit mjegullohet nga perdja e tymit, e propagandës dhe e disinformimit, duke e bërë gjithnjë e më sfidues, deri në fshirje, dallimin e realitetit nga iluzioni.

Fjalët hidhen në ajër, jo me qëllimin për të kuptuar, por thjesht për të bërë zhurmë si dioksid argumentësh më të dëmshëm se vetë dioksidi i karbonit.

Dialogu është shndërruar në një monolog kaotik, ku të “ftuarit” rreken të dominojnë skenën duke raportuar jo atë që ngjet në realitet, por atë që duan ata të shesin se ngjet në rradaken e tyre. Dialogu nuk nënkupton më shkëmbim idesh, por një garë se kush prodhon decibelët më të lartë. (Akuzat dhe kundërakuzat nuk bëjnë më asnjë përshtypje)

Viktima e parë e kësaj katraure komunikimi mbetet më e dobëta e kohës sonë… e vërteta.

Demokracia, e brishtë siç është, kthehet në kakofoni, fjalët humbasin fuqinë dhe asgjë nuk bën më përshtypje.

Thuaj çfarë të duash, trego sa të duash, ekspozo skandalin më të madh.. asgjë nuk ndodh,.duke nxjerrë kështu jashtë loje manualët e komunikimit, gazetarisë dhe fushave të ndërlidhura me to.

Në një garë për t’ia kaluar artit, gjendja e sotme e komunikimit të kujton John Snow te “Game of Thrones”, një nga personazhet më të dashur edhe për faktin se përpiqej t’i shpallte të vërtetën kundërshtarit dhe që thotë: “Kur ka njerëz që bëjnë premtime të rreme, fjalët nuk kanë më kuptim. Nuk ka më pyetje, veç gënjeshtra gjithnjë e më të bukura”.

E lemë me kaq pasi jam i bindur që dieta e leximit që po përhapet ditët e sotme, nuk lejon gëlltitjen e më shumë fjalëve se kaq…

MË TEPËR

Sport3 orë më herët

Fituesit e Kampionatit Europian në vite

Fituesit e Kampionatit Europian që nga fillimi i Turneut pasi SpanJa mundi Anglinë 2 – 1 në finalen e së...

Mix3 orë më herët

Tri trajtime me rozmarinë për flokë të fortë e plot shkëlqim

Foto ilustruese, marrë nga Google Të trajtosh flokët e dëmtuar apo t’i mbash ata të shëndetëshëm, janë dy procese njëjtë...

Mix3 orë më herët

Lista e nominimeve të Emmy Awards 2024

Çmimet 76-të vjetore Emmy janë gati të njohin më të mirët kur bëhet fjalë për të gjitha programet e reja,...

Mix3 orë më herët

Njihuni me disa nga ushqimet më të mira kundër plakjes!

Specat e kuq (jo djegës) Specat e kuq kanë një përmbajtje të lartë vitamine C, që është shumë e mirë...

Mix3 orë më herët

11 Ushqime të shëndetshme që trupi juaj do t’ju falënderojë për të ngrënë

Nëse jeni në kërkim të një dietë të ekuilibruar dhe të shëndetshme, këto 11 ushqime nuk duhet të mungojnë në...

Sport3 orë më herët

Goli i Lamine Yamal kundër Francës, më i bukuri i “Euro 2024”…

Ishte një gol që thuajse e eliminoi Francën. Dymbëdhjetë minuta pasi Randal Kolo Muani (9’) hapi rezultatin, Lamine Yamal, anësori...

Radar3 orë më herët

“Basha i gjuajti me llastiqe Berishës”, analistët: Duhet ta kishte vrarë politikisht, pastaj të merrej me Ramën

Analistët Ergys Mërtiri dhe Neritan Alibali, të ftuar “Top Talk”, në një diskutim mbi opozitën, kritikuan mënyrën se si Lulzim...

Mix5 orë më herët

Çfarë i bën shëndetit të zorrëve pirja e kafesë çdo mëngjes

Një filxhan kafeje në mëngjes nuk ju zgjon vetëm për ditën, por gjithashtu ju jep një shtysë miliarda mikrobeve miqësore...

Mix5 orë më herët

Johnny Depp nxjerr në shitje pikturat e tij, ja sa kushton njëra prej tyre

Aktori Johnny Depp ka zbuluar një pikturë të frymëzuar nga ish-partnerja e tij Vanessa Paradis, duke e përshkruar atë si...

Mix5 orë më herët

10 Fruta që duhet të konsumoni Çdo javë për një shëndet të mirë

Frutat janë ai grup ushqimesh që nuk duhet t’i shmangni kurrë. Ato falin ëmbëlsi, freski, shije dhe shumë vlera ushqyese...

Facebook