Pse Shqipërisë i duhet një lider si Lulzim Basha?

Koment nga Ardit Haxhija

Pse Shqipërisë i duhet një lider si Lulzim Basha?

Shqipëria ka treguar se nuk është një vend i lehtë kur vjen puna tek votimet dhe aq më pak tek qeverisja. Gjatë historisë së saj, si shtet, vendi është qeverisur nga liderë thellësisht autokratë, individualistë dhe shpeshherë me sjellje prej diktatori.

Udhëheqës që kanë vënë veten mbi gjithçka dhe kanë përdorur çdo lloj mjeti për të arritur qëllimet e tyre.

Korrupsioni, krimi, sharjet, dhuna, shkatërrimet, rindërtimet, pazaret kanë qenë kryefjala e çdo qeverisjeje. 

Në mëngjes kanë shpallur armiqtë, në darke janë puthur me ta. Kanë akuzuar pa fakte, kanë hedhur baltë mbi atë që e konsideronin mik dhe kanë mbështetur atë që e konsideronin armik.

Modele të tilla kanë ndikuar thellësisht në përditshmërinë e shqiptarëve. Egërsia në drejtim, pazaret, bashkëpunimi me krimin janë kthyer në modele për shqiptarët e thjeshtë.

Në çdo institucion është rrenjosur dhuna, egërsia apo trajtimi i zyrave të shtetit si pronë private. Një frymë e tillë është përhapur në pjesën më të madhe të shoqërisë, duke u kthyer në kulturë.
Në anën tjetër, Lulzim Basha, që prej daljes së parë në publik deri më sot, ka treguar se është një lider atipik. I sjellshëm, i edukuar, i butë, me një qasje totalisht ndryshe.

Asnjëherë i përzier në konflikte personale, fyerje apo lincime. Gjithmonë larg krimit, dhunës apo shpifjes.

I kujdesshëm në maksimum në daljet e tij apo fjalët që thotë, duke qenë i vetëdijshëm për rëndësinë e fjalës, nisur nga profesioni i juristit.

Rasti më i fundit kur foli për rastin McGonigal vetëm pas daljes së vendimit në Amerikë, është treguesi më i qartë i një kulture ndryshe.

Sigurisht, është shumë e vështirë që një lider i edukuar, i butë dhe jo konfliktual të kthehet në faktor në një vend ku dhuna është kthyer në modë.

Por nuk është faji i tij që është i edukuar, por i atyre që kanë injektuar modele dhune në shoqëri dhe i kanë kthyer ato në kulturë.

Koha ka treguar se vendet e zhvilluara kanë ecur përpara me kulturë, edukatë dhe sjellje të kontrolluara.

Dhuna nuk ka qenë, nuk është dhe as do të jetë tregues i përparimit. Sado që mund të bësh dy hapa përpara sot për interesa personale, koha do të hedhë 10 hapa pas.

Vendi ka nevojë për një sjellje krejt ndryshe.

Vendit i nevojitet një drejtues ku dhuna dhe krimi të urrehen nga çdo pjese e trupit dhe frika ndaj ligjit duhet të jetë kryefjalë.

Sjellja e të fortit duhet të çrrënjoset njëherë e mirë nga kultura jonë. Deri më sot kemi parë që me atë qasje nuk shkojmë larg.

Ka ardhur koha për një ndryshim rrënjësor në politikën shqiptare, ku krimi, dhuna dhe korrupsioni të konsiderohen si cenim i sigurisë kombëtare dhe të denohen maksimalisht.