Kioske
Absurdi i Mosbindjes Civile për Qeveri Teknike dhe pa kandidat për Kryeministër!!!
Skerdilajd Zaimi
Duket se nga protesta e gjatë e dritares që ish-kryeministri Berisha ka zhvilluar prej javësh tashmë ka dy mesazhe politike: i pari është i ashtuquajturi bashkim me grupin matematik të Gazmend Bardhit që defaktorizon PD-në e vulës dhe kërkesa e përsëritur e Berishës për qeveri teknike.
Si përherë mes paradokseve logjike z. Berisha pasi bëri thirrje për Mosbindje Civile e uli objektivin e saj te ky mesazh:
…u bëj thirrje qytetarëve shqiptarë të bashkohen për një qeveri teknike si kushti i të gjitha kushteve që qytetarët shqiptarë të votojnë të lirë. Të votojnë me dinjitet, të zgjedhin ata drejtuesit e tyre. Si kushti i të gjitha kushteve për të vendosur barazinë para ligjit. Për t’u dhënë shqiptarëve sistemin e drejtësisë që meritojnë.
A mund të rrimë ne soditës para kësaj situate? Jo, kurrë! Ndaj dhe duhet të ngrihemi në betejën pa kthim, në mosbindje civile në çdo qytet, në çdo skaj të Shqipërisë. Për një qeveri teknike. Për betejë, rotacionin e pushtetit
Një Mosbindje Civile për qeveri teknike është diçka në kufijtë e parodisë politike. Por megjithatë kërkesa e bërë ngjan të negociohet me destabilizimin e vendit, çka e bën atë të perceptohet si imperativi kategorik i opozitës së z. Berisha.
Ky është një mesazh që mund të përkrahet edhe nga aktorë të huaj në Perëndim që ndjejnë se qëndrimi i z. Rama në pushtet është i barabaratë me nekrozën e demokracisë së sajuar shqiptare. Mirëpo me këtë kërkesë z. Berisha ka një defiçit të madh strategjik.
Për cilin shkak formal Edi Rama do të dorëhiqej? Çështja McGonigal nuk dha atë që pritej, pra nuk shpërtheu sa për të vënë në lëvizje një proces, seancat proceduriale të SPAK nuk japin ndonjë gjë veç idesë se drejtësia po funksionon, akuzat e Ahmetajt janë ende në shqyrtim. Dhe z. Rama mbetet ende në dukje i pacenuar. Deri kur të kemi një goditje reale të drejtësisë që do të mund të konfirmonte përgjegjësinë e kryeministrit në një aferë të supozuar.
Përtej këtij elementi z. Berisha duhet të sqarojë se çfarë fitohet me qeverinë teknike që është një hap mbas krahasuar me thirrjet për përmbysje të regjimit, që dëgjuam kohë më parë. Çfarë garancie sjell një qeveri teknike të cilën opozita e pati edhe në 2017-n e sërish nuk qullosi gjë?
Dhe së fundmi: kush është kandidati për kryeministër i opozitës? Sali Berisha? Ilir Meta? Një beniamin konsensual i tyre? Z. Berisha nuk mund të hiqet si dedeja i fundit në këtë vend, që po muroset për parime në një zonë ku kushton 2000 euro/m2. Sepse, për të mos paragjykuar për kërkesën e tanishme, ne e dëshmuam sesi e zgjodhi ai kandidatin e Tiranës për zgjedhjet lokale, sesi spostoi Ilir Alimehmetin për të nxjerrë përpara një emër që vuri emër sapo doli në garë. Është shembulli i disatë i asaj se çfarë zgjedhjesh bën Berisha, që po paguan sot jo represionin e Edi Ramës, por faturën e zgjedhjes së vet të dikurshme me emrin Lulzim Basha.
Si një njeri që jeton me lavdinë personale dhe i pëlqen të mburret me karakterin luftarak, z. Berisha duhet ta dijë se edhe nëse e ka bërë mirë fortifikimin, do të fitojë kur të jetë në sulm. Po me kë do sulmojë?! Me bashibozukët politikë që ka vërdallë?! I urojmë suksese në 100 vjetorin e lëvizjes së Haxhi Qamilit, të cilën me siguri do ta rehabilitojë.
