Zheji: Largimi i Ramës është kërkesë që po e përsërit vetë ai

Analisti Artur Zheji, në një editorial në portalin e tij, 360grade.al, shkruan për të mirën dhe të keqen në politikë. Sipas tij, e mira nuk ekziston në politikë, sepse kushdo qoftë do bjerë në mëkatë, të vogla ose të mëdha. Megjithatë, ai thotë se duhet protestuar deri në largimin e Edi Ramës, për ta shpëtuar atë nga vetja e tij.

“Largimi i Ramës është një kërkesë që ai e përsërit vetë shumë herë, por ju nuk e kuptoni sepse flet me fjalë të përmbysura, na thotë “unë nuk iki!” që ju të protestoni edhe më fort, derisa ta largoni. Edhe me dëshirën e tij.

Nuk është dhe aq i keq, Rama, por është e keqe, e Keqja që e ka kapur dhe nuk do ta lëshojë. E di që duket e vështirë kjo për t’u kuptuar, por kështu është.

Duhet forcuar Kuvendi dhe protesta e përhershme popullore derisa Shqipëria të fitojë stabilitet.

Shumë mirë që keni dyshime, shumë Vepra të Mëdha, janë bërë e shkruar, falë Dyshimeve të Mëdha!

Porse radhën e ka, e Keqja më e madhe, ajo duhet të largohet nga ky vend dhe të mos rrijë në krye të saj. Duhet të largohen banditët nga Kuvendi dhe politika, duhet të largohen rrugaçët nga kryesimi i bashkive dhe i reparteve të ndryshme të Shtetit.

Dhe kjo nuk kryhet me nje Kryeministër të fortë, por me një Parlament të fortë, një sistem gjyqësor sa më të drejtë dhe nën kërcënimin e Protestave të përhershme!”

“Mos harroni asnjëherë se e Mira, e Drejta absolute dhe se Baraspeshimi i përsosur, nuk ekziston, kush ua premton këtë ju gënjen! Dhe ju gënjen hapur fare!

Na duhet pra, ta shpëtojmë këtë kryeministër nga vetvetja dhe nga ata që e kanë kapur, duke i premtuar, se kjo është rruga për të mbijetuar në Pushtet.

Natyra Njerëzore është e mbrapshtë, sicilit nga ne mund t’i gënjejë mendja se është më i miri, më i dituri dhe më i sakti se të tjerët…

Se “Ai” është edhe Rruga, edhe Dielli, edhe Zgjidhja!

Por e vërteta qëndron te Dyshimi Juaj! Dhe te trimëria për të Protestuar në emër të dyshimit tuaj të arsyeshëm!

Kush ju thotë ndryshe ju gënjen me qëllim!

Për fat të keq të tij apo të tyre, ka mjaft që e mendojnë ndryshe, mendojnë se po ja hedhin, se po hakmerren dhe se po ja fusin!

Kjo dhe është Përplasja! Nga e cila s’duhet të kemi frikë dhe s’duhet të rrimë mënjanë! Duhet të luftojmë që të na drejtojë e Keqja më e vogël, sepse e Mira absolute, nuk egziston dhe kush ju thotë ndryshe, vetëm ju gënjen!”