Kritike
Mjaft me arrestimet spektakolare të bluzave të bardha, si të ishin kriminelë me rrezikshmëri të lartë!
Nga Edi Oga
Mbështes plotësisht protestën e mjekëve të spitalit të traumës dhe vendimet e Sindikatës së Punonjësve të Shërbimit Shëndetësor!
Mjaft me arrestimet spektakolare të bluzave të bardha, si të ishin kriminelë me rrezikshmëri të lartë! Kjo drejtësi “populiste” nuk mund të fshehë pafuqinë e shtetit për të goditur kriminelët e vërtetë!
Të gjithë shtetasit janë të barabartë përpara ligjit dhe duhen trajtuar njësoj në raport me të! Askush nuk ka të drejtë t’i cënojë dinjitetin një profesionisti duke përdorur dy standarte për të vendosur përpara ligjit shkelsat e tij!
Ndërkohë që personave me precedentë penalë dhe në kërkim ndërkombëtar shteti u dërgon letra për vetëdeklarim, u jep kohë për t’u mbrojtur me avokatë, i heton në gjendje të lirë apo në arrest shtëpie, mjekëve të dyshuar për shkelje u hedhin hekurat në pavione dhe i plasin në qeli!
Afërmendsh që mjekët do ta lënë këtë vend nëse trajtohen kështu! Ju garantoj se mjekësia popullore, yshtjet dhe nuskat nuk do ta bëjnë punën e mjekut, kur të keni nevojë për të dhe ai të mos jetë!
