Tani që Berisha e ka akuzuar Bashën si vegël mjerane të Ramës, në PD nuk ka më vend për të dy. Njëri do të fluturojë.

Gazetari Klodian Tomorri, situatën në PD pas vendimit të Lulzim Bashës, për të përjashtuar nga grupi Parlamentar Sali Berishën e analizon duke marrë parasysh rolin e të dy figurave në selinë blu.

Sipas Tomorrit, njëri prej të dyve do të fluturojë dhe ai duket që është Lulzim Basha, pasi Berisha ka më shumë mbështetje në PD.

“Është shumë interesante situata në PD. Tani që Berisha e ka akuzuar Bashën si vegël mjerane të Ramës, në PD nuk ka më vend për të dy. Njëri do të fluturojë.

Basha kontrollon grupin parlamentar dhe forumet drejtuese të Partisë. Tashmë është e qartë se pse ai nxitoi për të bërë zgjedhjet në Parti.

Dhe është po kështu e qartë se vendimin për të hequr Berishën e ka marrë shumë kohë më parë. Por mesa duket Doktori është shumë i fortë në bazë. Në këtë situatë, organet e zgjedhura të partisë nuk përkojnë me vullnetin e bazës”, shkruan Tomorri në rrjete sociale.

Sipas tij, asnjërit prej të dyve nuk i intereson çarja e PD-së, por, Berisha nuk ka rrugë tjetër përveçse të heqë Bashën.

“Tani lind pyetja se çfarë mekanizmash ka ai për të çuar mbështetjen që ka në bazë në organet drejtuese të Partisë?

Njëra rrugë do ishte të kërkonte pezullimin e Bashës në Këshillin Kombetar. Por aty Basha i ra të keqes para kur shpejtoi me zgjedhjet dhe vuri njerëzit e tij në Këshill. Në këtë situatë rruga e vetme që ka Berisha mbetet mocioni përmes kongresit të partisë. Për këtë i duhet të mbledhë firma dhe të bëjë fushatë poshtë në bazë. Ndaj po flet për referendum dhe dialog me demokratët Baca.

Por, edhe kjo nuk do jetë e lehtë. Me gjasa presioni i Shteteve të Bashkuara do të jetë i madh dhe i drejtëpërdrejtë. Një gjë është e sigurtë. Berisha është “all in” në këtë betejë dhe lufta nuk mbaron derisa njëri prej të dyve të jetë palosur përfundimisht”, analizon më tej Tomorri.