“Agron Shehaj nuk është vetëm sipërmarrës, por ai është model i suksesit. Më kujton veten time kur kam nisur punën në OKB, në instutcionet e Hagës. Ky është një djalë që ka dalë nga Vlora me asnjë lek në xhep, ka mbaruar finance-kontabilitet në Itali dhe ka ndërtuar me shpatullat e veta në Itali në fushën e teknologjisë së informacionit, ka investimet nga Roma në Londër, ka 2 mijë vende pune në Tiranë. Kam luftuar 6 muaj ta bind Shehajn, që vjen nga një familje patriotike, dhe i kam thënë; vjen në një moment që duhet të japësh në jetë.”

Deklarata e mësipërme i përket as më pak e as më shumë, vetë Lulzim Bashës në një intervistë në ‘Opinion’ në vitin 2017, kur surprizoi të madh e të vogël brenda PD-së me vendosjen e Agron Shehaj të parin në Vlorë për zgjedhjet e përgjithshme. Ishin të shumtë ata që kritikuan këtë zgjedhje, mes tyre sidomos ata që u larguan me një të rënë të lapsit nga partia, përmes asaj që sot cilësohet si listat e zezë e 2017-ës.

Sipas Bashës, ‘rregulli i artë’ në parti është se askush brenda partisë nuk duhet t’i dalë kryetarit kundër. Dhe kandidimi i Shehaj për kryetar, e ktheu këtë të fundit në armik të partisë 

Veprimin krejt normal të Agron Shehaj që shkoi te zyra e Edi Palokës dhe konfirmoi firmat e delegatëve të degëve 5 dhe 7 që ai drejton në Tiranë, e cilësuan si show për protagonizëm personal. Krejt ligjërisht e logjkisht pas konfirmimit te firmave, Shehaj tha se Kuvendi i 11 dhjetorit ishte legjitim dhe se ishte i detyruar te merrte pjesë aty. Dhe nga këtu nisi vala e radhës e sulmit ndaj deputetit demokrat.