nga AgroWeb

Dy mënyra shumë natyrale dhe ekonomike se si ta bëni këtë fare lehtë në shtëpitë tuaja j’ua sugjerojmë në këtë artikull. Foto: Flickr

Fytyrat e yndyrshme sipas dermatologëve kanë disa anë të mira dhe disa të këqija.

Tek grupi i parë rendisim vetëhiratimin e fytyrës gjë që siguron lëkurë më të butë dhe të shëndetëshme.

Këto lloj lëkurash gjithashtu kanë tendencën që të mos krijojnë rrudha aq shpejt sa fytyrat e thata.

Megjithatë ata që kanë një fytyrë të yndyrshme e kuptojnë fare mirë që jo çdo ditë lëkura është e hidratuar e butë dhe e shëndetëshme.

Yndyra e tepërt ka tendencën të bllokojë poret, të krijojë akne dhe t’ju lërë një lloj shkëlqimi vajor mbi ballë, faqe apo mjekër që nuk është aspak i pëlqyeshëm, sidomos kur është nxehtë.

Për të mbajtur një balancë të lëkurës duhet punuar sistematikisht, për ta mbrojtur atë nga faktorët e jashtëm si dhe për t’i dhënë jetë qelizave nga brenda.

Dy mënyra shumë natyrale dhe ekonomike se si ta bëni këtë fare lehtë në shtëpitë tuaja j’ua sugjerojmë në këtë artikull.

Argjila jeshile të cilën mund ta gjeni të bluar në çdo farmaci ju vjen në ndihmë.

Mënyra e parë

1 lugë gjelle argjilë jeshile

1-2 lugë gjelle çaj rozmarine ose ujë të ngrohtë

Përgatitja

Argjila jeshile ka veti thithëse dhe pastruese ndaj do ta ndihmojë lëkurën tuaj të ndihet e butë dhe e hidratuar pa pasur yndyrë të tepërt në sipërfaqe.

Për këtë mjafton të përzieni në një tas të thellë argjilën me çajin ose ujin pak nga pak, derisa të formohet një masë kremoze, por jo shumë e ujëshme.

Vazhdoni me përzierjen derisa të shikoni që maska juaj ka marrë formën e një kremi.

Lyeni me të fytyrën dhe një pjesë kalojeni deri poshtë në qafë, në mënyrë që e gjithë pjesa që ekspozohet më shumë të marrë trajtim.

Qetësohuni dhe shtrihuni diku për rreth 10-15 minuta në varësi të trashësisë së maskës, derisa të thahet plotësisht.

Mundohuni të mos bëni mimika apo të flisni gjatë kohës që maska thahet që të mos krijoni rrudha në lëkurë.

Do ta kuptoni menjëherë efektin e saj pasi fytyra do të ndihet e tërhequr shumë shumë e thatë gjatë këtij procesi, por është një reaksion shumë normal.

Më pas shpëlajeni fytyrën me ujë te ngrohtë derisa të keni larguar të gjithë maskën.

Ndjesinë e butësisë së përfituar mund ta ruani duke aplikuar tonikun tuaj të preferuar të lëkurën ose me pak krem hisratues.

Mënyra e dytë

Kjo mënyrë është thuajse e ngjashme me të parën, por me disa përbërës shtesë për një maskë më pak agresive me fytyrën.

Do t’ju duhen vetëm përbërësit e renditur mëposhtë.

1 lugë gjelle argjilë jeshile

1 lugë gjelle çaj rozmarine

Gjysmë luge gjelle mjaltë

Gjysmë luge gjelle kos

1 lugë kastravec i grirë

Përgatitja

Për të nisur me këtë përgatitje AgroWeb ju këshillon të zgjidhni një enë të thellë dhe të hidhni në të argjilën.

Më pas shtoni çajin e ngrohtë të rozmarinës pak nga pak, duke bërë kujdes që masa mos të jetë shumë e ujshme.

Duke përzier shtoni kosin, mjaltin dhe kastravecin e grirë hollë.

Përzieni mirë të gjithë përbërësit me dorë ose me anë të një luge dhe aplikojeni kremin e krijuar në fytyrë dhe qafë.

Maskën mbajeni për 15-30 minuta derisa të ndjeni që është mpiksur mbi lëkurë.

Gjatë kësaj kohë qëndroni shtrirë, qetësohuni dhe ndjeni efektin e maskës në fytyrë.

Në fund të procesit lajeni fytyrën me ujë të ngrohtë dhe thajeni me kujdes./AgroWeb.org