” Fakte kemi por s’i themi ” Asgjë e re nga intervista e Yuri Kim në ‘Open’

Ambasadorja e SHBA në Tiranë, Yuri Kim ka komentuar disa nga çështjet më të debatuara të momentit në një intervistë që zgjati vetëm 30 minuta në ‘Open’ në ‘News 24’.

Ajo është ndalur në akuzat e kryeministrit Edi Rama ndaj SPAK, raporti i SHBA me Sali Berishën dhe PD-në nëse ish kryeministri rimerr drejtimin e PD-së, apo dështimi apo jo i reformës në Drejtësi.

Më poshtë, disa nga deklaratat e përmbledhura të Yuri Kim:

A mund të hiqet non-grata e Berishës nëse ndryshohet administrata në SHBA?  

Kim: Mbi 200 persona janë përcaktuar nga Sekretari i Shtetit për korrupsioni domethënës dhe iu është ndaluar hyrja në SHBA, atyre dhe familjarëve të tyre.

Nga këta, zero raste janë zmbrapsur. Nuk mendoj se është realiste të mendosh se një ndryshim i qeverisë do të ndryshonte disi faktet. Faktet janë të qarta dhe mendoj se çdo shqiptar i kupton faktet.

Marrëdhëniet e SHBA me një opozitë të drejtuar nga Berisha

Kim: Qëndrimi i Shteteve të Bashkuara mbi këtë çështje është shumë, shumë i qartë por përfundimi është se nuk do të kemi të bëjmë me dikë i cili është shpallur publikisht nga Sekretari i Shtetit për korrupsion madhor apo për minim të demokracisë dhe do të ishte fatkeqësi nëse nuk do të kishim marrëdhënie normale me një parti me të cilën kemi pasur një marrëdhënie të veçantë për një kohë kaq të gjatë.        

SPAK po dështon?

Kim rendit emrat e bandave, ish-ministrave dhe deputetëve që janë prapa hekurave: ish-Ministri i Brendshëm, ish-Prokurori i Përgjithshëm, dy ish-kryebashkiakë, ish-Ministër i Mjedisit janë dënuar, gjykatës dhe prokurorë po ashtu janë nën hetim, tri kryebashkiakë janë në gjyq…

Peshku i madh në rrjetën e SPAK

Kim: Mendoj se ky është një proces dhe merr kohë. Përsëris, reforma në drejtësi nuk do të jetë e lehtë, e shpejtë apo e përsosur, por po shohim përparim. Do t’ju pyes: kur ishte hera e fundit që dy ministra të partisë qeverisëse u futën në burg? Kur ishte hera e fundit? Më duket se s’ke ndonjë përgjigje të mirë për këtë.

Korrupsioni në të gjitha nivelet

Kim: Korrupsioni është një problem në të gjitha nivelet e qeverisë. Ndaj mendoj se ka veprime që duhet të vazhdojnë të ndërmerren dhe të shpeshtohen për t’u përballur më këtë problem.

Ambasadorja reagon për herë të parë për peticionin online ndaj saj

Kim: Mendoj që njerëzit në një demokraci kanë të drejtën të shprehin pikëpamjet e tyre. Ndonjëherë bazohen në fakte, ndonjëherë jo, por pavarësisht kësaj, kanë të drejtën absolute ta shprehin. Kështu që respektoj pikëpamjet që shprehen.

Unë nuk veproj mbi baza personale dhe nuk jam me pushime këtu. Unë përfaqësoj Presidentin e SHBA këtu.