Kreu i PD, Sali Berisha ka folur për skandalet qeveritare, si ajo e inceneratorëve apo edhe abuzimet me akset rrugore.

Gjatë një takimi me krerët e degëve të PD në Tiranë, Berisha akuzoi qeverinë se paratë e vjedhura i fshehin në emra të personave që s’kanë asnjë lidhje me aferat si të moshuar, të vdekur etj.  

Berisha: Kjo është një betejë për jetë a vdekje e demokracisë shqiptare e cila de facto sot të vetmen gjë që ka, ka atë arritje të 7 korrikut, opozitën e vërtetë në shesh betejë. Të gjitha këto kanë ndodhur para syve të shqiptarëve, të botës.

E them këtë para jush me lutjen që ta ndërgjegjësojmë veten dhe qytetarët, se shpëtimi vjen vetëm nga Partia Demokratike, Shoqëria Civile dhe forcat e tjera politike opozitare. Ne jemi ata që duhet të vendosim për të marrë fatin tonë në dorë.

Ne sot kemi një qeveri e cila në mënyrë absolute nga mëngjesi e deri në darkë nuk ka agjendë tjetër veç vjedhjes së qytetarëve. Ju e shihni, çdo ditë dalin milionat e parave të vjedhura të fshehura, diku te një bari në Athinë, diku te varrezat e Shkodrës, tek qytetarë të ndryshëm të gjallë dhe të vdekur që s’kanë asnjë lidhje me paratë që kanë fshehur tek ata.

Prisni, është fillimi, se këta të cilët kanë ndërtuar kilometrin e rrugës Ibë-Farkë me 30 mln euro, aty vëllimet e punimeve nuk janë kurrë më shumë se 3-4 mln euro maksimumi, se kanë patur një shembje. Pra, 10-fishi. Kanë vjedhur dhe i kanë depozituar në emra të gjallësh, të vdekurish, pensionistësh në azil.