Kryetari i Partisë Demokratike, Sali Berisha, është shprehur se “Primaret” e zhvilluara ditën e sotme në PD, as që krahasohen me modelin e Partisë Socialiste, që sipas tij vepron njësoj si ligji i mafies.

Komentet Berisha i bëri gjatë një daljeje për mediat, pas përfundimit të votimit në “Primare” dhe përfundimit të numërimit të votave në disa qytete.

Berisha shtoi se PD do të hyjë në zgjedhjet lokale më ballëlartë se kurrë më parë dhe sipas tij rruga e vetme për demokracinë është vota e lirë.

“Që të gjitha papërjashtim, si vullnet i mirë i kandidatëve, apo propozimeve të Partisë Demokratike. Imagjinoni që këtë proces transparent para mediave dhe mbarë shqiptarëve, ta krahasosh me skutat mafioze të partisë tjetër, që njëlloj si në ligjin e mafies, nuk pipëtin asgjë. Qytetarët shqiptarë nuk kanë asnjë ide se çfarë ndodh brenda atij bodrumi. Vetëm klithmat e kreut të asaj force politike. E rrëzikshme për të ardhmen e vendit. Kjo procedurë e PD-së, këto primare, ju rikujtojmë shqiptarëve se rruga e vetme është vota e lirë. S’ka demokraci pa votën e lirë.

Ne shkojmë në këto zgjedhje më ballëhapur se asnjëherë parë shqiptarëve. Ne nuk fshehëm gjë. Ne shpallëm publikisht ata që garuan dhe sot numërohen votat në mbarë vendin. Shpreh vlerësimin tim më të madh për të gjithë ata që morën pjesë në këtë garë. Nuk pretendoja të ishte një proces i përsosur, por u bë çfarë ishte e mundur për diçka të tillë. Eksperienca e këtij procesi pasuron Partinë Demokratike. “Primaret” janë rruga e vetme për të hapur PD-në si forca politike e të ardhmes”, u shpreh Berisha.