Besmir Semanaj, ekspert IT, ka qenë i ftuar në emisionin “Të Paekspozuarit” në MCN TV, ku ka folur për satelitët e kontraktuar nga qeveria shqiptare për 6 milionë euro. 

Sipas Semanajt, këto satelitë janë njëlloj si makinat me qira dhe kanë kosto të fshehura. Ai deklaroi se shërbimi që marrim nga satelitët, mund të bëhej me mënyra alternative dhe kosto të ulëta. 

“Shqipëria nuk zotëron asnjë satelit. Shqipëria nuk ka ngritur satelitë, por ka marrë me qira dy emra. Përshembull, unë nuk kam buxhetin të ble Ferrari, por kam buxhetin që një jave ta mbaj Ferrarin me qira dhe të dukem si i pasur.  Ajo që ne vuajmë, është mungesa e transparencës, nuk kemi kontratë të publikuar. Kemi një kontratë të bërë publike nga hakerat.

E para, do të përdoret për agrikulturën, përfshirë luftën ndaj kanabisit, për ndërtimin pa leje dhe disa fusha të tjera. Shqipëria këto i ka mbuluar me drone, me fotografim nga ajri nga shteti Italian, etj.

Duke u bazuar se ajo që tha profesoresha e nderuar, që dy satelitë nuk mjaftojnë dhe duhet konstelacioni, nëse hapim kontratën, thuhet se nëse shtetit shqiptar, i nevojitet më shumë pamje, shteti do të paguajë 3 euro për kilometër katrorë. Shkon rreth 84 mijë euro i gjithë territori i Shqipërisë. Nëse Shqipëria do të merrte çdo muaj, do ti binte diku te 1 milion euro në vit. Pra për 3 vite do të kushtonte 3 milionë euro. Nëse kërkon video, është 17.25 euro për kilometër katrorë. Satelitët nuk do të përmbushin kërkesat e qeverisë, do të kërkojmë nga kompania shërbime të tjera, që janë kosto të fshehta.

Këto shërbime që mendohet se po ofrohen nga satelitët, i kemi patur. Të gjithë këto shërbime kanë qenë pa pagesë. Një pikë ka qenë menaxhimi i trafikut. Këto ti jep edhe Google me çmim qesharak, disa mijëra euro. Pra, kemi thjesht një fushatë marketing sikur Shqipëria u bë fuqi hapsinore.

Është njëlloj si çanta e Louis Vuitton që jepet si arritje e popullit shqiptar. Është fllusk sapuni, që e vërteton edhe heshtja e institucioneve. Askush nuk pranon të replikojë.

Vetëm në Shqipëri, blihet produkti dhe pastaj shohim për cfarë mund ta përdorim”, deklaroi Semanaj.