Audiopërgjimet për gjobëvënie, Tiku i Rilindjes furnizohet nga familja Rama, ndaj ka imunitet

Audiopërgjimet për gjobëvënie, Berisha: Tiku i Rilindjes furnizohet nga familja Rama, ndaj ka imunitet

Berisha tha se Doçi furnizohet me dokumente nga Rama ndaj nuk preket nga organet e drejtësisë.

Sali Berisha

TIRANË– Kryetari i Partisë Demokratike, Sali Berisha ka denoncuar ditën e sotme se gazetari Adriatik Doçi, të cilin e quan ‘Tiku i Rilindjes’, është i lidhur me familjen e kryeministrit Rama. Gjatë konferencës me median, Berisha tha se Doçi furnizohet me dokumente nga Rama ndaj nuk preket nga organet e drejtësisë.

‘Para këtij, publikoi përjetoi vdekjen klinike të ABC News. Një spastrim të paparë ndaj gazetarëve. Vetëm se ata nuk ishin në një valë me Devollin që herë thotë e kam, njëherë thotë nuk e kam. Devolli është vala e Ramës. Personi i fundit që ka mbetur aty është zoti Demi. Edhe ndaj tij po bëhen presione prej rrugaçësh që të ikë dhe të kontrollohet përfundimisht nga Endi Fuga, Sokol Balla dhe dora e Ramës dhe Veliajt. Tiku i Rilindjes është gazetar i familjes. Ai furnizohet me dokumente nga familja Rama, prandaj është i paprekshëm.

Një gjobëvënës i shpërfytyruar, i shpifur. Por gazetari i familjes kryeministrore ka imunitet. Sikundër kanë imunitet për SKAP-in e partisë Duçka dhe Neza. Edhe njëherë i bëj thirrje FBI dhe Kongresit të SHBA, të hetojë rolin e Yuri Kim dhe paraardhësit të saj në aferën McGonigal se do ndihmonin shumë vendin e tyre, do ndihmonin Shqipërinë dhe shqiptarët. Ambasadorja Kim, me një seri të gjatë veprimesh, ka mbajtur të njëjtat qëndrime ndaj opozitës si McGonigal, por heshtja e saj ndaj këtij sistemi gjobëvënës nga bashkëkombas të saj, e rëndon atë. Nuk duhet të fshihet pas imunitetit diplomatik por të flasë për shqiptarët për këtë akt të pashembullt që nga koha e Perandorisë Osmane deri më sot.‘-tha Berisha.

Deklarata e Berishës vjen një ditë pasi media “Publiklive” ka publikuar disa audipërgjime ku gazetari i Report Tv, Adriatik Doçi, pohon se në këmbim të përfitimeve personale, para, ndere dhe banesa, nuk raporton lajme për biznesmenë, kriminelë dhe politikanë. Prej muajsh, gazetari akuzohet se qendron pas portalit “Prapaskena” ku linçohen publikisht dhe pa verifikim persona të ndryshëm. Në këto biseda të publikuara, Doçi rendit me raste biznesmenë që e paguajnë jo për reklamë, por për të mos i sulmuar. Pas publikimit, ai vetë nuk ka mohuar në asnjë rast autencitetin e përgjimit, duke pranuar se deklaratat janë bërë, por të nxjerra sipas tij nga konteksti. Gazetari pretendon se ka qenë duke i treguar një kolegeje mënyrën si funksionon tregu në Shqipëri, por nuk sqaron pse drejtohet në vetën e parë duke rrëfyer ai historitë e tij. Nga ana tjetër, pas publikimit, gazetari Naim Noka, drejtues i “Publiklive” denoncon se është kërcënuar nga Doçi për për fshirjen e përgjimit. Deri më tani, prokuroria nuk ka bërë asnjë reagim publik për rastin, por edhe pse gazetari mohon që të jetë ai pronar i “Prapaskena”, dje në ditën kur u publikuan këto përgjime, portali në fjalë botoi një artikull linçues për gazetarin Naim Noka. Këshilli Shqiptar i Medias, sakaq, kërkon reagim nga institucionet dhe komuniteti i gazetarëve.