Shqipërisë nuk i duhet një Kryeministër që e sheh vendin si Turist!!!

Nga Ardit Haxhija

Shqipëria është një vend me potencial turistik të jashtëzakonshëm, me peizazhe të mahnitshme dhe një kulturë të pasur. Megjithatë, ndihet se ky potencial nuk është përdorur plotësisht për arsye të ndryshme, dhe përpjekjet për të promovuar turizmin ndonjëherë kanë qenë më shumë propagandë sesa veprime konkrete.

Në këto vite, është vënë re një mungesë investimesh serioze në infrastrukturën turistike. Rruga e Kombit, e nisur në kohën e partisë demokratike, ende nuk është mbyllur, ndonëse kalojmë  me pagesë në të. Rruga e Thethit shfaqet si një shembull tjetër i infrastrukturës së dobët, ku dy makina shkëmbehen me vështirësi .

Rrugët e plazheve në jug dhe veri gjjthashtu nuk ofrojnë aspak standarde. Shumë prej tyre nuk kanë as rrugë, duke detyruar pushuesit të bëjnë udhëtime të gjata në rrugë pa rrugë për të arritur në ato zona. Edhe rruga drejt Komanit, ku ndodhen hidrocentralet kryesore dhe Tajlanda Shqiptare, është ndër rrugët më të dobëta.Për të mos harruar rrugën kryesore që ka Shqipëria, Shkodër – Tiranë e cila në këto 10 vite është trajtuar si rrugë e dorës së dytë por që në realitet është plaga më e madhe e kësaj qeverisjeje. Nuk mund të bëjmë propagandë për turizëm cilsor kur e vetmja rrugë lidhëse tokësore me Europen nuk ekziston. 

Turistët që vizitojnë Shqipërinë kanë pasur shpesh shqetësime lidhur me infrastrukturën dhe këtë e kanë reflektuar në komentet e tyre. Në vend që të mbajnë mend peisazhet dhe burimet natyrore, ata ndihen të prekur negativisht nga mungesa e kushteve të përshtatshme.

Një fakt tjetër që kritikohet është numri real i turistëve. Nuk mund të konsiderojmë turistë ato që vijnë nga emigracioni për pushime apo shqiptarët e Kosovës e te Maqedonisë. Megjithatë, dhe shumica e vizitorëve të huaj që vijnë konsiderohen turistë ‘one stop shop’ që vijnë e nuk kthehen më, ndërsa ata që mund të sjellin të ardhura afatgjatë shkojnë në vende të tjera si Greqia, Italia dhe Turqia.

Është theksuar se Shqipëria ka potencial për të ofruar punësim cilësor, por për shkak të situatës së vështirë, me qindra mijëra njerëz janë larguar nga vendi në këto 10 vite. Kjo situatë e bën edhe më të vështirë zhvillimin e turizmit.

Shqipërisë nuk i duhet një kryeminister që e sheh Shqipërinë si turist dhe mrekullohet nga bukuritë natyrore të vendit tonë. Shqipërisë i nevojitet një kryeminister qe e njeh me detaje vendin e tij dhe e di ku janë problemet reale që kerkojnë zgjidhje imediate.

Boll më me propagandë boshe. Nuk mashtrohen as te huajt as shqiptarët nga fotot e bukura apo gjoja bumin ne turizëm.Është e rëndësishme që turizmi të mbështetet nga veprime konkrete, dhe investimet në infrastrukturë, për të siguruar një përvojë cilësore për turistët dhe një kontribut më të madh në ekonominë e vendit.