Supë me lakër.

Përbërësit:

Lëng mishi 1.5 litra

Lakër e freskët 500 gram

Yndyrë 1 filxhan kafeje

Patate 2 – 3 kokrra

Karota 2 copë

Qepë 1 kokërr

Selino 1 kokërr

Domate 2 – 3 kokrra

Miell 1 lugë kafeje

Kripë

Piper majdanoz

Fletë dafine

Përgatitja:

Lakra e bardhë pritet në fije të holla ose në copa katrore. Zarzavatet e tjera priten në fije ose rripa ndërsa patatet në kubikë mesatarë. Në lëngun e mishit ose në ujë të valuar hidhet lakra e prerë dhe pas 5 minutash shtohen patatet.

Në tigan me yndyrë kaurdisen qepët, karotat, selinoja e grirë hollë dhe pak miell. Pas kaurdisjes shtohen domatet ose salca dhe sëbashku hidhen në supë. Zarazavatet e kaurdisura hidhen 10 minuta para përfundimit të zierjes së supës.

Në fund shtohet kripë, piper i zi, dafinë dhe majdanoz i grirë hollë. Kjo lloj supe është më e shijshme kur rri 4 – 5 orë (jo në zjarr), përpara se të konsumohet.