Miku amerikan, Nanos: Ministri yt i jashtëm është idiot. Nano: E di

Në disa kujtime të botuara nga DITA në korrik 2013, diplomati i njohur Fatos Tarifa flet për Bruce Jackson.

Në tetor 2002, Tarifa dhe ambasadori amerikan i asaj kohe në Tiranë, James Jeffrey, i propozojnë kryeministrit Nano ta priste Bruce Jackson-in në Tiranë si një “njeri të rëndësishëm dhe me lidhje të forta në Uashington”.

Tregon Tarifa ndër të tjera:

“Të nesërmen paradite, në 10:00, Bruce Jackson u prit në takim nga kryeministri Nano. Unë isha i pranishëm në të dhe, qysh në fillim, kuptova se Jackson dhe Nano, shumë shpejt do të bëheshin miq, siç edhe ndodhi në të vërtetë. Fjalët e mia për z. Jackson, të përforcuara nga përshtypjet e ambasadorit Jeffrey në Tiranë, bënë që kryeministri Nano të krijonte besim tek ky “emisar” jozyrtar i Uashingtonit dhe ta konsideronte atë ndër miqtë e tij të afërt.

Pas atij takimi dhe, vazhdimisht më vonë, ata do t’i drejtoheshin njëri-tjetrit në emër: Bruce dhe Fatos. Kaq të afërt u bënë për njëri-tjetrin këta dy individë, saqë në takimin e tyre të fundit në Tiranë, në fillim të majit 2005, në praninë time, Bruce Jackson i është shprehur kryeministrit Nano se “your foreign minister, Islami, is an idiot” (ministri juaj i jashtëm, Islami, është idiot). Dhe Nano iu përgjigj: “I know” (“E di”).

Nëse z. Jackson shprehte hapur në atë kohë përshtypjen e tij për Kastriot Islamin, karakterin, cilësitë njerëzore dhe paaftësinë e të cilit si ministër i jashtëm i kishte njohur mirë për afro një vit e gjysëm, kryeministri Nano, duke pranuar “idiotësinë” e Islamit, nuk nxirrte ndonjë sekret shtetëror.

Besnikëria e Bruce Jackson-it ndaj kryeministrit Nano u manifestua edhe më qartë dy muaj më vonë, më 1 korrik 2005, vetëm dy ditë para zgjedhjeve parlamentare të atij viti në Shqipëri, kur z. Jackson, bashkë me James O’Brien (i cili kishte qenë këshilltar i ish-Sekretares së Shtetit Madeleine Albright dhe i dërguari i posaçëm i Administratës së Presidentit Clinton për Ballkanin) në një artikull që botuan në gazetën e famshme The Wall Street Journal, me titull “Albania’s Choice”, u shprehën hapur në favor të Partisë Socialiste në ato zgjedhje. Në artikull Jackson dhe O’Brien e mbështesnin hapur publikisht Partinë Socialiste dhe kryeministrin në detyrë në atë kohë, Fatos Nano, duke përfunduar me këto fjalë: “Për pjesën më të madhe të shekullit të 20-të Shqipëria ka qenë e parëndësishme për ne, por ajo çfarë do vendosë populli shqiptar [në zgjedhjet e së] djelës do ketë shumë rëndësi për të gjithë ne”. / Dita /