Afganët e strehuar në hotelin e Hysenbelliut janë nëpunës të Fondacionit ‘Shoqëria e Hapur’ e miliarderit George Soros

Nga fotoja me pagesë me anti-sorosianin Grennell, te hapja e hotelit luksoz për afganët e Soros. Detaje nga jeta e një biznesmeni shqiptar

Politiko.al

Irfan Hysnebelliu, pronar i News 24 dhe Panorama, është një nga shembujt e qartë të lidhjeve të çuditshme dhe kundrathënëse në botën e biznesit shqiptar.

Një nga piruetat e fundit të Hysenbelliut është hapja e hotelit luksoz Prestige Resort për të pritur mbi njëqind afganë, mbërritur fillimisht nga Kabuli në Tbilis dhe më pas në Rinas. Afganët e strehuar në hotelin e biznesmenit janë nëpunës të Fondacionit ‘Shoqëria e Hapur’ e miliarderit George Soros me aktivitet në kryqytetin afgan Kabul. Është interesante se si ata janë veçuar nga afganët e tjerë të strehuar në ‘kushte normale’ në Qytetin Studenti.

Prestige Resort i Hysenbelliut është një resort me 5 yje në bregdetin e Adriatikut, i pompuar shumë nga mediat në pronësi të biznesmenit për ekskluzivitetin, një klientelë të zgjedhur dhe kushtet  komode.

Çka e bën më përshtypjelënëse zbarkimin e sorosianëve në Prestige Resort është edhe një fakt tjetër. Dy javë më pare, sipas raportimeve mediatike, Hysenbelliu është shfaqur në jahtin e tij në bregdetin e Jugut me ish-ambasadorin e Trump në Gjermani Rick Grenell, gjithashtu ish-i dërguar i posaçëm për Ballkanin dhe më pas, përkohësisht shef i shërbimeve inteligjente amerikane.

Burime me njohje në qarqet politike shqiptare dhe amerikane i thanë Politiko.al se bëhet fjalë për një operacion të pastër lobimi, çka do të thotë se botuesi ka paguar për takimin me Grenell dhe për një foto me të. Sipas burimeve, takimi i botuesit me njeriun e afërt të Trump ka qenë një përpjekje për presion ndaj kryeministrit Rama, duke i dhënë shenjë këtij të fundit se botuesi ka akses në qarqe amerikane me lidhje në Washington. Hysnebelliu me mediat e tij ka qenë rreshtuar me linjë editoriale kundër qeverisë gjatë zgjedhjeve të fundit duke i varur shpresat te një fitore e Bashës e të cilin ka lidhje të afërta.

Humbja e opozitës e ka frikësuar Hysenbelliun, i tha Politiko një burim me njohje në rrethet e afërta të biznesmenit dhe fotoja me Grenell ka qenë një ‘operacion presioni dhe zbutjeje’.

Kjo zbutje, fare qartë, mund të përkthehet në paktin që biznesmeni ka bërë me njerëzit e qeverisë për afganët e zbarkuar në hotelin e tij, Prestige.

Fakti se ai takon një anti-sorosian të ashpër për të zbutur raportet me Ramën, dhe më pas strehon vartës të Sorosit për të mundësuar këtë zbutje, nuk duhet të habisë askënd.