Përgjimet e këngëtares Elsa Lila me anëtarët e grupit kriminal të trafikut të drogës në Itali janë zbardhur nga mediet italiane. Lila  dyshohet se ishte menaxherja e grupit dhe detyra e saj ishte të merrej me financat dhe lekët që fitonin nga aktiviteti i paligjshëm. Grupi përdorte celularë të koduar për të mos u përgjuar. Numri i personave të përfshirë dyshohet se ka qenë më i lartë, pasi në një dëshmi të personave të përfshirë thuhet se: “Nëse ‘kutia’ hapet, do duhet të bëjnë një burg të ri në Romë!”.

Mediet italiane  kanë publikuar edhe disa pjesë nga përgjimet e bëra nga prokuroria italiane.

“Si mund të gjesh një shok brenda aparatit shtetëror?”, thotë  një i përgjuar në telefon.

 “Nuk më vjen njeri nga shteti për të më kontrolluar, më njohin, kam marrëdhënie të shkëlqyera. Në një rast më dhanë një gjobë por më thanë të mos e paguaja sepse nuk do ta kontrollonin. Sepse këtu si në Shqipëri duhet një mik/lidhje me shtetin, se çfarëdo qeverie të jesh do të shpëtosh, duhet të gjesh një rrugë pasi edhe këtu shiten kaq shumë”, ka thënë Lila në përgjime.

Veç Elsa Lilës, në pranga përfunduan edhe 7 persona të tjerë, përfshirë boksierin Petrit Bardhi, i njohur si “Titi”.