Të dashura dhe fëmijë të paligjshëm, jeta sekrete e Vladimir Putin

Jeta e Presidentit rus Vladimir Putin është e mbuluar me mister dhe zona të errëta, veçanërisht sa i përket jetës së tij private. Gjatë muajve të fundit, pas shpërthimit të luftës në Ukrainë, janë shfaqur të dhëna të ndryshme të pakonfirmuara dhe të pakonfirmueshme në lidhje me familjen e tij.

Në media përflitet për fëmijë të paligjshëm dhe të dashura të ndryshme të tij.

Familja e Putinit është e mbrojtur nga thashethemet e nivelit të ulët, por, pavarësisht kësaj mburoje, disa lajme kanë rrjedhur në publikun e gjerë.

Anëtarët e familjes janë përfitues të një sistemi kleptokratik në të cilin Putin sundon si një kumbar mafioz, me toger oligarkë që paguajnë haraç në formën e pasurisë dhe pallateve për të gjithë ata në sferën afektive të Putinit, shkruante New York Times qysh në vitin 2008.

Ajo që dihet gjerësisht është se Presidenti rus ka dy vajza legjitime, Maria dhe Katya, me ish-gruan e tij Lyumila Ocheretnaya.

Katya mbi 40 vjeç, thuhet se është vajza më e disiplinuar e Putinit. Ajo është e martuar me Kirill Shamalov, djalin e Nikolai Shamalov, një aleat i ngushtë i Presidentit rus dhe aksioneri më i madh i Bankës Rossiya.

Të dy u martuan në një nga vendpushimet e preferuara të skive të Putinit, Igora, në një ceremoni luksoze mes shesheve të patinazhit dhe lojërave me drita. Në dasmë mori pjesë edhe motra e saj Maria, e cila mbërriti nga Holanda me bashkëshortin e saj Jorrit Faassen.

Për dekada Maria jetoi në Holandë, por që nga viti 2014, kur separatistët rusë rrëzuan një aeroplan të Malaysia Airlines që u nis nga Amsterdami, ajo është bërë objekt i shumë kritikave nga fqinjët e saj dhe më gjerë.

Një flamur ukrainas me mbishkrimin Ave Maria Putin u vendos së fundmi në një ngastër toke afër Amsterdamit që Faasen e kishte blerë kohë më parë.

Megjithatë, mediat ndërkombëtare kanë përshkruar një lloj familjeje në hije, të përbërë nga të dashura fantazmë dhe fëmijë të paligjshëm. Në rrethin emocional të kreut të Kremlinit, në fakt përfshihen edhe disa gra të tjera “jozyrtare”.

Si, për shembull, Svetlana Krivonogikh, nga Shën Petersburg, e cila, siç përflitet në qarqet e thashethemeve, ka pasur lidhje me vetë Putinin.

Gruaja tani është mbretëreshë e pasurive të paluajtshme, një anëtare e bordit të Bankës Rossiya dhe një aksionere në vendpushimin e skive Igora ku u zhvendos Kathya.

Mediat shkruajnë se Elizaveta Vladimirovna Krivonogikh lindi nga lidhja e tyre.

Të dyja, nënë e bijë, kanë jetuar në një pronë luksoze në Montecarlo, larg vëmendjes së mediave.

Megjithatë, gruaja më e fundit që ka thyer zemrën e Putinit është Alina Kabaeva, ish-kampionia ruse e gjimnastikës, e cila, sipas disa thashethemeve, është edhe gruaja e liderit rus.

Alina Kabaeva thuhet se jeton në Zvicër me fëmijët dhe ka një klinikë prestigjioze në Lugano. Aq sa Kabaeva prej lidhjeve me Putin, ka përfunduar edhe në pikën e sanksioneve britanike. Kabaeva thuhet se është parë kohët e fundit në Moskë, por, si me të gjithë anëtarët e familjes së Putinit, ishte një paraqitje disa sekondash, shkruan Il Giornale.

Më pas, mbi të, ashtu si për pjesën tjetër të familjes, është ngritur një mur mbrojtës. Nuk dihet nëse këto thashetheme janë thjesht thashetheme apo përfaqësojnë të vërtetën. Kjo pasi jeta e Putinit vazhdon të jetë e mbuluar në hije.