Berisha paralajmëron protesta: Me bojkotin ndaj samitit të BE, Rama zgjodhi Beogradin. Vasal i hapur i Vuçiç

Berisha paralajmëron protesta: Me bojkotin ndaj samitit të BE, Rama zgjodhi Beogradin. Vasal i hapur i Vuçiç

Në një tryezë me temë “Të rikthejmë Shqipërinë në rrugën europiane”, kryetari i zgjedhur i Partisë Demokratike, Sali Berisha, thotë se në këto vite ne po rreshtohemi nga një njeri në anën e kundërt të historisë.

Ai deklaroi se Ballkani i Hapur apo mini-shengeni që u themelua në Novi Sad, sipas themeluesit Aleksandar Vuçiç, tre ditë pas samitit u shpall se kjo është Jugosllavia e Vjetër, plus Shqipërinë.

Sipas tij, në këtë proces të pranimit nga Edi Rama të hegjemonisë serbe në rajon, u formua aleanca trilaterale, ku Kosovën e cilësojnë pjesë të territorit serb.

Në këtë proces u konsoliduan në një mënyrë ose në një tjetër, lidhjet jo vetëm me Beogradin por edhe me Moskën. Ky proces solli një përçarje një luftë të ftohtë, mes Shqipërisë dhe Kosovës, solli atë të cilën asnjë shqiptar që sheh si të ardhmen më të mirë të vetes dhe vendit, BE, nuk mund ta imangjinonte.

Ndodhi që një aventurier, vasal, pa interesa vendi dhe kombëtare, të deklarojë dje se refuzoj ftesën, nuk kam pse shkoj në Bruksel. Ky vendim merret absolutisht më para në Beograd, shpallet nga padroni i tij.

Por ai me një farë etike se thotë do mbledh qeverinë. Por ky i bindet padronit. Kurrë ndonjëherë fati ynë nuk ka qenë më larg duarve tona se kësaj radhe, që nga viti ‘45 kurrë ndonjëherë fati ynë nuk është përcaktuar në Beograd siç bëhet sot. Aleanca trilaterale Beograd-Tiranë-Shkup, është absolutisht pro ruse dhe anti-Bashkimit Europian. Midis Brukselit dhe Beogradit, Rama zgjodhi Beogradin.

Samiti që mblidhet më 23 dhe 24 qershor në Bruksel, është historik se aty i ofrohet një vendi në luftë që po ofron për Europën dhe lirinë, statusi i vendit kandidat dhe sfidohet haptaz agresori rus.

Ky moment do ishte nderim i madh për shqiptarët të përfaqësoheshin aty. Bojkoti i këtij akti është haptaz përçmim ndaj tij, është dizaprovim ndaj këtij akti, është haptaz rreshtim në krahun tjetër.

Vuçiç mund të mos shkonte se ai nuk zbaton sanksionet e BE ndaj Rusisë, po Edi Rama? Nuk shkon vetëm e vetëm se nuk shkon Aleksandar Vuçiç! Vasal i hapur i tij.

Preteksti se vetoja bullgare ka bllokuar… Vetoja vërtetë ka bllokuar, por është në zgjidhje.

Për të u morën në mënyrën më të fuqishme më të mëdhenjtë e Europës dhe i dhanë një zgjidhje të sigurtë, edhe pse jo ideale. Mund të mos bëhet dhe sjellë rezultatin në këtë samit, por e ka të sigurt në samitin tjetër.

Berisha deklaroi se Edi Rama është aventurier dhe shkel mbi ëndrrën tonë dhe vokacionin tonë perëndimor.

Në këtë linjë, shtoi se Rama dje u nis turist në Francë, por se nuk duhet të kthehet më por të rrijë në azil, me aktin që po projekton.

Berisha tha ndër të tjera se duhet thirrur protestë e fuqishme, duke e cilësuar si moment ekzistencial për kombin, teksa nënvizoi se nuk mundet që një njeri i shitur të luajë me fatin tonë në këtë mënyrë.

Edi Rama ka shndërruar Tiranën në Beogradin e vogël! Nuk mundet që ne të jemi Beogradi i vogël, ne jemi kryeqyteti i Shqipërisë dhe shqiptarëve.

Mbrojtja e identitetit tonë dhe ëndrrës europiane, është një detyrim i joni dhe PD duhet të qëndrojë në lartësinë e obligimeve të veta.