Viliem Kurtulaj

Është rast i rrallë, ndoshta unik, që kryeministri i një vendi, në të cilin ndodhin 1001 të zeza, të shprehet se ai nuk ka asnjë përgjegjësi për çdo gjë të keqe që ndodh në vendin që drejton. Rama u shpreh dje në televizionin Top Channel se nuk ndjen asnjë përgjegjësi për sulmet denigruese që ai vetë bën prej vitesh ndaj mediave dhe gazetarëve që i nuk shkojnë pas avazit. Madje, organizata ndërkombëtare “Reporterët pa Kufij”, nëpërmjet raporteve vjetore të saj, ka dënuar disa herë gjuhën fyese të kryeministrit shqiptar i cili shpesh i ka etiketuar mediat si kazan, i ka hequr të drejtën e pyetjeve gazetarëve të caktuar, madje duke iu thënë se duhet të shkojnë në riedukim.

Rama gjithashtu është shprehur se ai nuk ka asnjë përgjegjësi për krimet dhe vrasjet mafioze që ndodhin në vend. Madje, para pak vitesh, po ndihej aq i bezdisur nga vrasjet mafioze që kryheshin çdo javë në Shqipëri sa që deklaroi se s’kishte ndërmend të merrej me ta, por i uroi me një shprehje popullore “hëngshi kokat e njëri-tjetrit”. Është e vështirë të besohet se një kryeministër jo i marrë flet në këtë mënyrë për një problem kaq të madh.

Emigrimi në masë apo, më mirë ta thuash, shpopullimi që po ndodh në Shqipëri është një nga fenomenet më shqetësuese në vend. Për këtë problem, kryeministri Rama ka deklaruar disa herë që ka shumë faktorë që e kanë shkaktuar këtë situatë të pashpresë përveç qeverisjes. Ai ka qeverisur mirë por shqiptarët “të pangopur” po e braktisin këtë vend nga sytë-këmbët. Për pasojë, edhe për këtë problem, kryeministri nuk ndihet ndopak përgjegjës.

Dini ndonjë rast ku gjysma e anëtarëve të një qeverie të ketë përfunduar në burg për korrupsion dhe shpërdorim detyre, ndërkohë që kryeministri i asaj qeverie vazhdon të jetë në pushtet i pashqetësuar? Do e keni shumë të vështirë të gjeni një rast tjetër përveç Shqipërisë? Gjysma e kabinetit të kryeministrit Rama ndodhen sot të dënuar dhe prapa hekurave, ndërkohë që kryeministri nuk ndjen asnjë lloj përgjegjësie, as ligjore, as politike, as morale. Ai sillet dhe shprehet sikur nuk i ka përzgjedhur dhe emëruar vetë këta njerëz për të drejtuar vendin. Imagjinoni një vend tjetër në Evropë ku gjysma e qeverisë përfundon në burg për korrupsion, ndërkohë që kryeministrit, jo që nuk i hyn gjemb në këmbë, por vazhdon me “stoicizëm” në krye të detyrës ta udhëheqë vendin “nga fitorja në fitorje”.

Çdo gjë e keqe që ndodh në këtë vend mund t’i bie mbi kokë çdokujt por asnjëherë kryeministrit, i cili përflitet se ka filluar ta shohë veten si lider suprem, si një lloj perëndie në tokë, pasi vetëm zoti s’ka kurrë faj dhe, rrjedhimisht, s’ka përgjegjësi. Më e keqja është kur militantët e shohin atë si të tillë. Në realitet, “kryeministri i pafajshëm” është thjesht kryeministër i papërgjegjshëm.